一年一度嘅中學文憑試（DSE）噚日放榜，聽聞唔少年輕人因為中文科肥佬可能升唔到大學。讀餐死一樣都升唔到大學，自然好down，有人選擇repeat考多一年報一箭之仇。就好似當年晉佳咁，讀band 3學校，讀書又唔叻，A level中文一樣係肥佬，之後決定repeat寒窗苦讀，半夜三更匿埋廚房溫習，晚晚除咗對住本書，就係對住屋企隻西施狗你眼望我眼。咁就辛辛苦苦過咗大半年，卒之勉強考到大學之中嘅「上車盤」，總算有個交代。考試衰咗嘅話，已經心情唔好，但係對repeat嘅考生嚟講，最討厭唔係讀書，而係遇到啲講風涼話嘅叔叔，「一年時間算得上啲乜嘢呀，想當年我……今日咪幾好……」事實上，如果呢位叔叔有炒開股票，心底裡笑緊𡃁仔，其實可能係自己笑緊自己，而不自知。
入唔入到大學，對唔少年輕人，係all or nothing嘅事，考生有視死如歸嘅決心，其實值得尊重。要repeat，自然要諗盡辦法，去補習、去自修室、去改善溫習模式、甚至改變性格都好，總之第二年一定要得，絕不容許tri-peat。同一個考生，細個入大學，長大變成散戶叔叔，日日番工放工，唔覺唔覺原來將當初嘅決心抹走咗，番工hea做不特止，仲諗住炒股等運到，炒足幾年得個桔，銀包冇增長事小，上進心大倒退事大。講到尾，原來自己最拼命嘅第一次，已經畀咗公開試，亦已經係最後一次，老老實實，如果肯用同一份上進心放喺投資，回報豈止一張大學畢業證書？
炒股者不進則退
散戶買股票前嘅平均裝備時間，肯定同投資股票風險回報完全唔成正比。𡃁仔要幾十小時工時去準備一科考試，叔叔可能睇一兩本股市雞精書，然後再研究幾分鐘、望吓市盈率就去瞓身買股長揸，或者係聽到啲分析員話內銀幾倍市盈率、年年派息，就當自己做咗功課，放心去馬，情況等於考試之前求其聽吓書就上戰場。迷失一年事小，唔好彩喺上落市中伏，高追低沽，輸咗一年儲蓄，仲衰過DSE repeat一年。
的而且確，同讀書一樣，未必人人有炒股資質，但參與得呢個遊戲，唔改進自己，就會俾其他進步者吞噬，等於考試一樣講拉curve，努力之下，你可以由輸變唔使輸，或者由唔贏變贏少少，總有得着。只不過，人長大咗，以為自己經歷多咗，就係一種進步，實情係唔覺唔覺喺度退步，當年考公開試嗰個自己去咗邊度？要將來炒股有好成績？要搵到下一隻浙江世寶（1057）？就唔好再畀藉口了，搵番以前考公開試的自己吧。
晉佳
版面調動關係，晉佳暫代王昇一天