有一個畫面，在何媽媽腦海揮之不去，那就是女兒被警察屈手捉腳抬離示威現場，她笑說像是隻「飛鼠」；所以在預演佔中時，她選擇自行起身被警方帶走。四年前女兒投身社運，她曾經告誡，抗爭路途漫長，「倒不如先讀好書」。今天她跟女兒一起公民抗命，一同被捕，因為這些年，她從女兒身上看到爭取公義的決心與堅持，「我覺得佢做緊一件正確嘅事」。
「家長冇理由唔支持」
凌晨時分清場，何媽媽跟女兒被分批帶返黃竹坑警校。羈留期間她不時上廁所，看見女兒在另一房間，心才踏實；但同時想到女兒早前在反新界東北發展示威時已被捕過一次，律師說有可能立即被起訴，難免不安。
一房之隔，何潔泓也想起母親說過，還未接受到被捕的風險，因為擔心工作和同事的目光，「但我估計佢坐得落去，其實已經諗得清楚，冇話好擔心」。
何媽媽坦言，7.1當晚沒想過要留守遮打道，但聽見一班年輕人在台上發言，為理想為公義，眾人的熱血，令她決定豁出去。那時候，她不單是孩子的母親，也是個有良知的香港人。「佢哋係學生都行出嚟，我哋係家長，冇理由唔支持，冇理由睇住佢哋俾人拉，而喺屋企度袖手旁觀，我過唔到（自己）。」
四年前，何媽媽看過一幀照片，女兒守護菜園村，在堆土機前被大批警員拉扯，「我即刻喊出嚟，好氣憤，點解佢哋要咁樣對一個手無寸鐵嘅市民？」
她心痛，但以女兒為傲，「因為佢用身體，為村民做咗少少嘢」。自此，她不再甘於做一個平淡的師奶，開始關心社會，「其實係應該，我有對腳，見到唔公義就要行出嚟，發完聲之後就做番家庭主婦、返工，好似齒輪咁不斷向前」。
何媽媽曾經希望女兒讀好書、找份工，安穩過一生。女兒原本念港大護士課程，「好正啦，讀完出嚟有3.7萬一個月」，突然轉讀嶺大哲學系，叫她氣上心頭。「我嬲咗一個禮拜，我同自己講，與其佢讀到死口死面唔開心，就算出來有3.7萬又如何？每個父母都一樣，只要子女開心就最好。」
「社會係需要呢啲人」
母女一同被捕，難聽的說話免不了。何媽媽說，7.1留守當晚，丈夫不斷來電催促她回家，有擔憂也有指摘，「佢覺得我係害死緊個女」。她沒反駁，「從來社會運動都係由年輕人開始，我哋喺後面支持」。這四年，她看見女兒的堅持，認真研究議題，以理服人，「你應該高興見到佢對社會有承擔，佢係一個咁有理想、正義感嘅女仔，我做母親係開心」。
為了公義，女兒越走越前，何媽媽沒有想過叫停，「社會上係需要呢啲人」。她只提醒女兒一句「槍打出頭鳥」，「佢𠵱家仲係年輕、血氣方剛，覺得要盡一分力。或者若干年後，佢再成熟，就會擴闊去另一個層次。我相信佢哋嘅將來，都會係美好」。
何潔泓也自覺幸福，有個勇敢的媽媽，讓她無後顧之憂，「媽咪咁投入，完全唔係僥倖，其實係幾年嚟嘅溝通，慢慢理解所造成」。