有「深圳李嘉誠」之稱嘅黃楚標，佢姪仔黃成藝，喺馬圈令人最有印象，應該係今年3月以520萬，投得嗰期最貴拍賣馬「帝聖之寶」。
呢匹兩歲仔至今仲未上陣，不過就試過幾次閘，其中最近一次係7月4號，跑個全無威脅嘅第三名，而之前幾次大閘，表現亦唔突出，老實講暫時進度一般，新季插入四班係咪超級，睇怕要觀察一排先有答案。
不過黃成藝另一匹愛駒「帝聖好好」就勁咯，可以話係假四班馬，真一班實力，至今五戰得一冠三亞一季，只贏過一場四班1000米直路賽，表面睇唔算太特別，但大家要留意，佢贏馬嗰場自己狂放，頭兩段造33秒22，原來係上季直路賽最快段速，四班馬用一班時間去搶放，末段無潰散不特止，仲可以頂到底贏馬，而蹄下敗將亞軍馬「陽明囍囍」，再出好似癲咗咁，大勝四個馬位，此可見「帝聖好好」幾咁厲害！呢匹馬新季先四歲，進步空間仲好多，睇嚟黃成藝唔使靠「帝聖之寶」，一樣可以有排贏！