學民思潮同學仔今年大概有10個中六生放榜，最好成績嘅係一名義工，就讀沙田地區英中，5科5**、兩科5同1科4級，真係好叻仔。
Isabella考慮佔中爭普選
學民成員唔少嚟自英中名校，讀大埔區英中嘅Isabella，拎到通識5**、英文5*同5科4級，成績都唔錯，佢話好想讀中醫，希望可以幫到人。
佢話以前間中學，大把同學政治冷感，今年5月入咗學民之後，先搵到同路人，好開心。
Isabella話唔係嚟學民識朋友，而係要幫社會做啲嘢，𠵱家香港越來越多學生參與社運，年輕人要捍衞教育嘅權利、社會公義，佢已經考慮去佔中，「唔通為咗專業資格而去背信棄義？」
上個月推動622全民投票嘅時候，一位阿叔喺街站突襲Isabella，睩大對眼哄到好埋，同佢講：「靚女，你係咪想香港變到好似烏克蘭咁Ｘ樣？」當時Isabella覺得好驚，但無減佢對爭取普選嘅決心。
而就讀嘉諾撒聖家書院嘅周庭，成績加埋有22分，英文仲係5*級㖭，升大學應該無問題啦，佢話想入讀啲同社會科學有關嘅學科。