巴西近年嘅實力其實已經失色唔少，單睇成績，今屆攞到個殿軍其實都算唔錯。不過睇番個過程，巴西嘅表現就真係幾令人失望，而俾人鬧爆嘅教練史高拉利（大菲）同埋佢愛將費特都喺賽後要離開球隊。
大菲喺大敗俾德國1:7之後，已經拒絕辭職，仲死撐自己嘅執教成績好。最後季軍戰再以0:3輸埋畀荷蘭，兩場總共失咗10球。球隊兩次被大炒後，大菲自己都俾巴西足總炒魷魚。其實大菲嘅執教生涯成績都算亮麗，3次帶隊踢世盃，除咗喺2002年帶巴西捧盃外，2006年帶葡萄牙同今年都有個殿軍。可惜係今屆輸嗰兩場輸得太樣衰，賽後仲要死撐，搞到英名盡喪。
「廢」特無癮退休
而一直備受批評嘅前鋒費特都宣佈退出國家隊。其實佢都算無奈，質素唔夠係事實，但唔係佢自己話要場場打正選㗎！今屆賽事佢只係對喀麥隆嗰場入咗1球，但係都踢足6場，只係喺季軍戰缺陣。表現唔好都冇得怪佢，後備嘅祖奧唔會好得過佢。而佢都有自知之明，退出國家隊一了百了，唔想再做代罪羔羊。
除咗費特之外，今屆表現都算出色嘅門將施薩索拉斯都會退出國家隊，佢話：「我就嚟35歲喇，再霸住個位就好自私，巴西有好多出色年青門將，所以冇問題。」