長實（001）新盤嵐山，隆重呈獻177呎蚊型劏房令全城嘩嘩聲，網上疑似內籠片段，一睇就知楊過同小龍女都住唔到啦。長實方面就話呢個「開放式單位」係畀分支家庭住，連埋隔離三房單位，方便一家親。不過說穿了的是，近來上車盤瘋炒，長實又點會睇唔到細價樓商機？部份半新股噚日鑊氣夠，好似恒寶（1367）、先達物流（6123）炒返上水面有突，所以之前隊過嘅半新股可望多幾眼。特別係近來內地唔少人都好鍾意買創仔做投資移民，貪大股東新上市半年內不可減持，又唔可以批股、供股抽水，對佢哋嚟講係一個好穩健嘅投資，結論係創仔新股有睇頭！
百本醫護（8216）呢隻本地醫療股主要做護士獵頭，市佔率高達49%。菲菲嘅護士朋友都話，絕大部份私家醫院都係透過百本請「陪人」，唔少網上論壇護士絲打都會叫人經呢間agent去搵工，所以呢隻7億市值嘅公司，其實係行業龍頭。另外，香港人口老化係人所共知事實；與此同時，護士荒問題一直存在，而政府亦着力培訓護士，解決護士荒問題。供應、需求同時增加，醫護中介百本自然如魚得水。
百本係配股上市，貨源歸邊唔使講。噚日雖曾再跌到去上市低位附近，但好快就打返上去，見到承接力，聞到見底味，呢隻護士股吸引力大，買入等炒上博得過。
Fifi
http://www.facebook.com/lovefrystock
本欄逢周二、四刊出