「大劉」劉鑾雄阿仔劉鳴煒今年初正式坐正做華人置業（127）主席兼行政總裁後，噚日首度擔大旗賣樓，主持記者會介紹旗下位於堅尼地城嘅新項目。未發言，先影相，有攝影師溫馨提示佢話「劉生，使唔使扣返粒（西裝）鈕？」點知劉公子即刻好豪邁咁答：「我不嬲都唔扣鈕！」Man到爆。
可惜一入到正題，劉鳴煒似乎有啲緊張，食螺絲，記錯料。佢開波冇耐話「普通單位呎數由250，呀……」好在助手即刻醒目遞上貓紙，佢可以睇住稿讀埋落去，原來普通單位呎數係由210至268呎。
到咗提問環節，劉公子亦超級謹慎，尤其問到推售時間、價錢等，佢都係答「暫時未可以透露，但會快。」「今時今日，好多嘢都唔畀講嘛……總之，會快。」基本上乜都冇講，劉公子全程留低大約5分鐘就閃了，仲快過早排啲快閃熊貓！