經過1個月嘅激戰之後，世界盃終於都踢完嘞！呢段日子入面，除咗經歷有史以嚟最唔夠瞓嘅時刻外，自己真係賺咗好多，最賺到嘅就係可以透過呢個專欄同各位波友分享吓我嘅小故事，對於我呢啲學生仔嚟講，真係有今生，冇來世呀！
經過今屆決賽周後，更加肯定一點，就係強隊都唔一定贏硬，只要你肯搏，無論你係邊個，都有勝利嘅機會。好似西班牙同意大利咁，佢哋夠強喇啩，但踢得唔進取，咪連16強都入唔到；尤其係西班牙，上屆佢哋靠Tiki-taka戰術捧走個盃，可惜今屆完全踢唔出花樣，點解呀？咪就係唔夠搏囉！
又諗吓美國同哥倫比亞，佢哋雖然冇咩球星，實力又被睇低一線，但就係因為夠搏，唔踢保守足球，主動出擊，無論輸贏都豁晒出去，結果換嚟全球嘅掌聲同認同；就連我都受到佢哋嘅啟發，做咩都搏盡佢，唔單止響Winner Stays嘅比賽瞓身拼搏，上星期仲響學校嘅社際戲劇比賽以教師嘅角色（圖）傾力演出，雖然最終兩個比賽都輸咗，但唔代表我失敗，因為成個過程我冇揸過流攤，付出嘅心機同汗水為我嘅青春留下紀錄。文：許家樂