世界盃完咗，大家係咪都有種解脫或失落嘅感覺呢？又要再等4年啦，不過如果年年都有，又未必有呢種搶眼球嘅魅力。球迷最鍾意睇嘅就梗係入波啦，今日就等我哋一齊回顧吓世界盃幾位入球機器嘅風采。
首選占士金球
印象最深嘅首先係哥倫比亞嘅占士洛迪古斯，5場入6球，要數最靚嘅當然係對烏拉圭一役喺4位防守球員包圍下，心口控球轉身抽射破網，睇到人目瞪口呆！另一金球當然係入4球嘅荷蘭隊長尹佩斯，用盡力猶如海豚頂波一樣，插水式頭槌笠死卡斯拿斯。除咗一個窩利一個頭槌，球王級嘅美斯（圖）又點會少得呢，美斯喺對尼日利亞嘅比賽以黃金左腳主射罰球，皮球彎至遠處，門將反應唔切，只可以目送個波入網。雖然世界盃完咗，但大家仍然可以喺各大聯賽欣賞幾位射手嘅射術㗎！
食「大四喜」至high
今日就講吓如果一位球員喺一場比賽入幾球嘅足球術語啦，例如係入兩球就會話「梅開二度」；入3球即係「帽子戲法」；入4球就係好似打麻將嘅「大四喜」。以後要識講喇！
陳婉婷
太陽飛馬助教
【依波Live】即睇直播：
http://worldcup2014.appledaily.com/match/live
http://bit.ly/EballLive