與闊太B食飯，客套地讚她手袋漂亮，誰知竟然觸動她神經，開始抱怨女兒Kelly的公司。是咁的，手袋是兩母女在歐洲旅行時買的限量版，旅行完Kelly搵到新工作，就拿限量版手袋返工。
眼利兼勢利的old seafood女同事問手袋幾錢，入世未深的Kelly照答，結果成為同事茶餘飯後的話題。闊太B很心痛：「只不過3萬蚊一個手袋就被人唱，乜嘢世界吖你話。我仲專登去買個1萬樓下嘅手袋畀佢返工用！」不只手袋，成身行頭要再執過，身上只准穿Zara這種中價貨，10萬元以上名錶更不能再戴。
行頭可以置過，但住所也是一個問題。有一日，上司問Kelly住哪，發現大家同住南區一個私人屋苑。同是街坊就好說話，點知再問座數，才發現Kelly原來住樓王。上司聞言後換個「其實你使乜返工」的微笑。說到這裡，闊太B幾乎想喊：「唔通我教個女講大話，連自己住邊都唔可以坦白？」
這個問題應該留返育兒專家回答，尤其是那些教小朋友如何讀名校嘅那些專家，開拓這條新戰線的話，一定大有市場。這類妹仔大過主人婆的故事，日日發生。另一個故事主人翁是一個二十出頭的年輕人，爸爸是上市公司高層，但他搵工從未靠過父親在商場的人脈，無人知他是誰。
在公司宴會上，他同樣被上司問住邊，年輕人答半山某大廈，外籍上司說自己也住那裏，我住5樓，你幾樓呀？年輕人猶豫一下，答頂樓penthouse，喝得半醉的上司哈哈大笑，拋低一句「good one」。翌晨兩人一同排隊等大廈接駁巴士到中環，年輕人是最後一個可以上車，他轉頭望望隊尾的上司，猶豫應該仿傚孔融讓梨，但最後他只是揮揮手，向臉帶錯愕的上司說goodbye。
何淑茵
mailto:[email protected]