鍾德勝，獨立電影導演，素食者，第一餐「皇家飯」，有火腿。7月2日清晨，撐到天亮才被抬走。「當日7點45分，我俾警察面朝下抬離遮打道，有屈手但不算大力，一定有留手。搜身之後就上旅遊巴去黃竹坑。等了一會就可以落車，入警校又再等，之後轉房，六個警察做登記程序。等了很久，警察明顯唔係做慣，填表時好似好苦惱，問旁邊同事點填，仲填漏三樣嘢。」
「冇真普選會再出嚟」
第一次被捕，全程沒身體痛楚，只係忍受汗臭及眼瞓。「個別警察惡些，例如收電話時，不覺其他現場警員刻意留難，態度其實幾友善，有被捕者還跟警員閒談，忘記了清場前大會叫大家『唔好』，都係笑着討論」。「第一餐皇家飯係白汁火腿飯，我本身係素食者，但我冇出聲，撥開塊火腿照食。人哋地頭，入咗虎口就唔再作對抗啦」。全日都在等，填表是手寫，還用過底紙，影相用寶麗萊，「好多嘢仲未電腦化」。
決定坐低抗爭是一剎那之間的事，「原本諗住Hea行到6、7點去打牌，點知牌又打唔成，遊行又行得慢，11點幾到場諗住旁觀見證呢件事，一路聽學聯演說『要出一分力』，睇到佢哋嘅決心，好感動，想參與其中。（記者：豈不印證示威者被煽動的說法？）我所做（留守）並冇違反我意願，就好似去一場演唱會，買飛入場支持，原本坐後排，現場氣氛好，我咪企起身又唱又跳，一樣係支持嘅表現。決定買飛嗰時我好冷靜、理性喎。」
「我會考慮下次的參與程度，坐後排還是坐前面。但如果8月出爐方案不是真普選，一定會再出嚟表態」。他在網誌補充，經過當日洗禮，某程度上令他不再害怕被捕，畢竟最大恐懼來自未知。