（電話響起，福嬸接聽）
福嬸：兩碟西炒飯，3杯凍奶茶，送去邊呀？瓊華中心13樓，好快到。
德叔：你寫個咩字，咩華中心呀？
福嬸：我諗唔起個瓊字點寫，寫住個鯨字頂住檔先，明就得啦！
德叔：搞錯呀，你假假哋都小學畢業，瓊字都唔識寫？
艇仔張：你又唔好咁話福嬸，我有時都執筆忘字啦，其實堂堂球星都可能唔識字，好似班巴西兵，真係連個醜字都唔識寫。
德叔：巴西兩場波失足10粒，球員輪流道歉，以後真係唔知點抬起頭做人。
肥頭：之前我聽艇仔張講，季軍戰一定開「大」，所以好熱都照買，點知都係唔掂，唔係荷蘭（圖）個後生仔補時整多粒，真係連1.57倍「大」都輸埋。
艇仔張：荷蘭已經hea住踢，下半場放水等你哋唔好主場輸得咁肉酸，但巴西都係破蛋乏力。我就衰貪心，「總入球」買5、6、7+，結果輸晒。
德叔：今次真係可以講，森巴足球已死嘞。
艇仔張：又唔好講得咁絕，巴西球員始終平均質素都係世界頂尖，國家隊雖然唔掂，但佢哋啲外援喺歐洲主流聯賽都係好重要，好似巴塞咁，尼馬、美斯同蘇亞雷斯呢個全南美組合，都令人期待㗎。
肥頭：我始終覺得巴西教練冇料到箒，搞到隊波攻不銳守不穩。
德叔：我哋呢代老球迷，有邊個唔係睇森巴足球大，就算唔鍾意，點都欣賞佢哋主攻踢法，希望呢次重重一跌，巴西可以振作啦。
人物介紹：
德叔——旺角茶仔老闆
肥頭——吹水怪
祥Hi——肥頭屋村老友
福嬸——茶餐廳侍應
艇仔張——扮專業賭友
大食肥牛——賭精一名，命中率甚高
【依波Live】即睇直播：
http://worldcup2014.appledaily.com/match/live
http://bit.ly/EballLive