繼太古地產（1972）旗下太古酒店進軍飲食業，希慎（014）亦靜悄悄做埋一份，位於銅鑼灣利園二期嘅法國餐廳Seasons by Olivier Elzer就係希慎20年來首次再度投資飲食業，至於會否陸續有來，消息人士就話「永不說不」。
其實太地與希慎做埋飲食業嘅理念好接近，兩間公司分別係港島東與銅鑼灣大業主，主要都係喺自己地頭，利用旗下物業開食肆，藉此帶動人流。
已相隔廿年
唔講唔知，希慎好多年前都搞過飲食業，希慎喺銅鑼灣嘅宏利保險大廈，前身係利園酒店，早於1971年落成，1994年拆卸重建。利園酒店喺度嗰陣，希慎就有經營裏面嘅食肆同酒吧（有間飲勝吧乃當年潮人蒲點），拆卸後，希慎就專心做寫字樓同商場。
希慎相隔20年再投資餐廳，聽聞係有高層早前認識到曾於中環置地L'Atelier de Joel Robuchon當總廚嘅法籍大廚Olivier Elzer，傾落發現銅鑼灣冇一間摩登法國餐廳，對方又想創業，於是一拍即合，以合夥形式合作。
呢間餐廳有8,000方呎，最大特色係氣氛輕鬆舒服，唔似一般高級法國餐廳，食客一坐低，仿佛就要正襟危坐，顧及所有餐桌禮儀。一個敞大嘅開放式廚房，食客可以睇住Olivier指揮其他廚師兼露兩手，呢位靚仔大廚仲會不時親自向食客介紹菜式㖭。呢度人均消費約千元。