最近個半月，好多汽車股炒到起飛，坊間最常見嘅「分析」係國產車銷情理想，而廣汽集團（2238）私家車於電影《變形金剛4》入面亮相，引證國產車質素大升，進軍美國市場指日可待云云。
細心留意《變4》的觀眾會發現，李冰冰駕駛的廣汽新款「傳祺」私家車（都幾難認得出），公路上鍊贏林寶堅尼，認真巴閉。可惜，戲入面那麼多輛強國代表，竟然無一部識得變身做變形金剛，究竟是廣汽「科水」不足，抑或美帝嫌國產車low-tech，實在無從稽考。
中國汽車業經常將「加大研發力度」掛在口邊，但筆者翻查六間本地上市的內地車企年報，發現車廠於研發上的開支（R&D expenditure），遠遠低過歐美對手。以寶馬為例，上年R&D投資47.9億歐元（約420億人民幣），佔銷售額6.3%；福士投資101億歐元（約852億元人民幣），佔銷售額5.8%。
終日幻想「超英趕美」的強國車，東風（489）去年投資16.3億元人民幣研發，佔銷售額4.4%，已經榮登「最揼本」的中國汽車公司。總裁王傳福口口聲聲話「分分鐘」可造出Tesla的比亞迪（1211），研發開支唔夠13億人仔，佔銷售比例得2.6%，股神兼股東的畢菲特肯定不滿意。華晨（1114）最孤寒，一年研發開支370萬元人民幣，嵐山劏房都未必買得起。
全球汽車生產商多如繁星，除非技術、質素明顯升呢，實在睇唔到國產車有何優勢。如果有一日，屋企牆上掛了張「美女跑車圖」，見到的並非法拉利、保時捷Maserati，而是吉利（175）、奇瑞或長城汽車，我想柯柏文始不介意由東風拖頭變出來。
凌波車