前日巴西對荷蘭場為榮辱而戰嘅比賽，原本諗住巴西會贏番個季軍，畀2億幾嘅國民有個交代，可惜最後都失敗而回，唔通佢哋都明白到國家嘅後起之秀實力根本仲未夠班，為咗激勵班生力軍喺4年後有更強嘅鬥心、更高嘅實力，所以徹底咁貫徹Risk Everything呢個理念，落重注咁博咗呢鋪，務求強勢回歸2018世界盃？
至於傷咗嘅尼馬嗰日就換晒衫坐喺後備席（圖），唔知仲以為佢有機會落場踢，當堂嚇咗我一跳，心諗唔係真係咁搏啩，傷成咁都要落場出番分力，直至完場後，見到佢返入更衣室時都要慢慢就住嚟行，嗰刻我腦裏面即時出現咗佢響後備席度好緊張嘅畫面，我終於明白佢嘅苦心，作為球隊嘅一分子，就算踢唔到，都渴望參與，同啲隊友共同進退，呢啲咪係真正嘅男子漢囉！
睇番成個決賽周，最值得欣賞嘅就係班巴西球迷，佢哋嘅熱情真係溶化咗好多人，希望我哋嘅香港球迷都有呢個heart，全力支持香港隊啦！
文：陳子樑
【依波Live】即睇直播：
http://worldcup2014.appledaily.com/match/live
http://bit.ly/EballLive