一名唔開名嘅前星級分析員坦言，分析員唔係生神仙，預測唔到所有嘢。佢仲提到曾經有個統計指，分析員推介嘅股票，扑中嘅機會低過五成，「即係擲公字亂估，都可能準過分析員」。
佢解釋，分析員嘅工作係將資料組織埋一齊，再去推測未來嘅走勢，不過「由於我哋未必拎到晒所有資料，過去嘅資料又未必一定推測到將來，所以唔一定準」。加上𠵱家好多分析員要做埋sales工作，做marketing、見客嘅時間仲多過坐低寫報告，佢都質疑有幾多人可以寫到真知灼見！
話雖如此，但佢認為分析員仍然有價值，事關𠵱家資訊太多，分析員嘅報告就可以過濾市場訊息，幫基金經理去蕪存菁。可惜呢位仁兄都唔願意再做過濾工夫，轉行了。唔少星級分析員都另覓發展空間，如陸東轉做基金經理，林奮強就創辦研究機構。