成日話新聞自由好重要，如果受到打壓，隨時會變到好似北韓咁。有幾恐怖？就係當全世界都知噚晚嘅世盃決賽，係由德國對阿根廷，北韓人民就認為，哥連泰斯球場踢緊北韓對葡萄牙嘅世盃決賽。唔使咁認真，只係網民惡搞出嚟嘅平行時空啫。
事緣網上流傳條片，相信係北韓電視台嘅新聞報道，報道講到北韓喺世界盃分組賽，先後以7:0贏日本，再以4:0贏美國，最後以2:0贏中國，跟住就即刻入決賽同葡萄牙爭冠軍。
揀葡萄牙全因有片源
報道入面北韓所面對嘅對手，日本同美國喺政治上都係北韓嘅敵人，所以佢哋大炒對手嚟振奮士氣都係十分正常。但係點解亦敵亦友嘅強國都成為對手之一呢？相信最主要嘅原因都係，佢哋咁啱搵到之前對強國嘅片用嚟剪囉。咁點解決賽對手會係葡萄牙？好明顯都係同一個原因，因為佢哋喺4年前嘅南非世盃對碰過，不過當時葡萄牙贏7:0，我求大俠都好有興趣想知，佢哋點樣剪到北韓可以贏到葡萄牙攞冠軍。
落埋金正恩夠認真
講番條片，除咗搵番之前北韓對中國嘅片段之外，仲將偉大嘅領導人金正恩嘅招牌拍手形象key咗落里約熱內盧Fan Fest嘅大電視度。不過香港人肯定覺得似王晶套《賭俠1999》，而且比「支持反中央同撐『張融』」專業好多，製作得都算幾有誠意。
不過，其實條片係有人惡搞嘅，為咗揶揄北韓冇新聞自由，純屬搞笑。香港都越嚟越少自由，遲啲分分鐘連Facebook同YouTube都冇得上，再唔爭取，話唔定第日只係「見到」國家隊攞世盃冠軍！
【依波Live】即睇直播：
http://worldcup2014.appledaily.com/match/live
http://bit.ly/EballLive