何志明，61歲，中港貨櫃車司機，因病而半退休。90年代起在內地生活十多年，今年第一次7.1上街，晚上10時多才走到中環，7.2凌晨3時許加入佔領，是最後一批被捕人士。「我本身只想去遊行，太太唔太支持，就自己一個人去。在天后站困到4時多，好唔容易上到地面，腳又痛，就慢慢走，冇所謂。唔算辛苦，唔使擔又唔使抬。走到波斯富街，經過學聯街站，聽到學生說晚上在遮打道需要支持，就去了。我信學生，至少冇利益衝突，純粹係唔滿意就發聲」。何志明最討厭造作的人，有時看到官員出來講廢話，「真係嬲到想掟爛部電視機」。
「大陸人只係出唔到聲」
「我走得慢，10點幾先到遮打道，本身只係喺旁邊行行企企，支持一吓」。凌晨3時許，警察開始拉大台的人時，何志明聽到學生持大聲公說：「如果你哋有心，請來圍住我哋啦。」他就加入留守，只想一起支持到8點。警方拘捕他時，他根本無力站起來，索性閉起眼不理睬警員。何志明走了一天，又坐了一晚，腿也酸了。
「今次係我首次參加7.1遊行，因為中央出白皮書，我好唔滿意。我想香港不變，但看來不行了。今年六四我亦係第一次去集會，之前都想去，但因返夜去唔到，請假又唔方便。又有十幾年住喺大陸。」何志明有想過在內地長住，但受不了部份內地人太向錢看，「（內地人）有利益就稱兄道弟，冇利益就冇偈傾。我怕香港會變成咁樣」。他相信上街是有用的，但一定要人多，「就係要畀佢知我哋唔滿意，你唔接受係你嘅責任，就唔好話我哋唔出聲，我哋有出聲，係你唔接受！唔好拎13億人同我哋一齊講，大陸都大把人唔滿意，只係被鎮壓住出唔到聲」。