相信唔少鍾意煮嘢食嘅朋友，都不時會到YouTube睇教人煮嘢食嘅短片。近呢幾個月，有個「煮家男人 Bob's Your Uncle」就以一個相當特別嘅方法教煮餸。
怕被優酷插播廣告
呢位煮家男由今年1月開始，至今炮製咗差唔多50條短片，教煮吓唔同菜式，由啤酒雞、滑蛋豬扒飯、土耳其薄餅、香蕉蛋糕、窩蛋牛肉煲仔飯，甜嘅鹹嘅都有教，片段剪接、拍攝技巧都相當專業，配埋香港人先明嘅潮語兼中英文字幕。
近月煮家男邊煮邊論政，最新一集教煮千層麵時，佢就評論7.1遊行人數，話自己係足球狂熱分子，跟隨愛隊去過唔少國際大型足球場，絕對有資格講人數多與少，知道乜嘢叫做10萬人，當見到警方話得98,000人簡直冇眼睇，「冇眼睇嘅數字係俾啲冇眼嘅人睇」。講完之後，佢又繼續煮番碟千層麵。
煮家男教整松子魚時，喺炸緊條魚時話，有內地網友問點解唔將啲片放上埋優酷，方便內地朋友睇，煮家男揶揄內地唔包容異見聲音，擔心自己有日講講吓長毛喺立法會拉布時，就會俾人插播五粮液廣告，最抵死係，煮家男真係即時插播五粮液廣告。
李八方
mailto:[email protected]