非常好彩可以輪到七月十四稿，有責任嘅Office佬/婆都應該請咗半日至一日假，至於你睇緊呢版嘅時候，失落感已經湧晒上心口，係，又要等四年，到時已經普選特首（希望係真嗰隻），仲有，香港飛去俄羅斯唔太遠，大家可以儲定水腳，到時飲Vodka食魚子醬睇波。
今屆最紅嘅人竟然唔係咩球王，反而係出牙嘅牙擦蘇，罰停賽後烏龜一齊陪葬，之後道過歉又贏番晒人氣，所以話佢儍？佢幫自己定咗個怪位，留名後世。至於最值錢一腳，反而又唔係踢波，係踢人，哥倫比亞辛尼加一腳鋤爆尼馬背脊（真係炒尼馬個背），順手將巴西踢落地獄。當晚嘅德軍七一事件，已經令我哋七八十後嘅球迷記一世，阿叔九泉之下都會咬住口煙陰陰嘴笑（執筆時德國未贏，但相信冇走雞）。
今次世盃期間，香港都唔少事發生，長毛要坐波監、白皮書、六二二公投、世界級黑客入侵香港網絡、五十一萬人遊行、佔領遮打、吳亮星敗會事件……至於大家食住花生睇嘅，當然有梁千金割腕（Sorry我知係人哋家事）同佢老母出嚟變身咬人一幕、李私煙絕食入廠鬧劇等等，總之成個世界盃未停過。
眼見西意英葡全體出局，爆完幾場冷門之後，莊家當然肥仔，下屆小心喇。伊朗頑抗、哥斯達黎加由冷變熱、阿爾及利亞同智利越戰越勇，證明世上並冇輸硬，相信香港人自會明白。
文：梁柏堅
【依波Live】即睇直播：
http://worldcup2014.appledaily.com/match/live
http://bit.ly/EballLive