成個特區政府，邊個最死不認錯？689特首梁振英認第二，恐怕冇人敢認第一。佢喺今年嘅施政報告，用咗條水蛇春咁長嘅標題，其中有句係「讓年青的各展所長」，當時已經有文化人甚至民政事務局局長曾德成都話過，應該係用「年輕」或者「青年」，689執迷不悟，俾人笑佢係文盲。
之但係，小圈子選出嚟嘅產物，不但唔使理民意，連對錯都毋須理會㗎。明知「年青的」係錯又如何？只要689佢鍾意，就錯都當啱，錯都照用。佢噚日喺行政長官網誌（係呀，呢個政府啲高層鍾意寫blog㗎），就以「讓年青的各展所長」為題，講自己喺禮賓府同過百名中學同大專生對談，內容講乜就唔係重點啦，明知啲中文係錯，都照樣一錯到底，都唔知點做後生仔榜樣囉。