光陰似箭，美國總統奧巴馬嘅任期過咗大半，上周六係佢執政第2,000日，雖然𠵱家評核佢嘅功過早得滯，但美國財經網站MarketWatch近日就對比佢同其他前總統在任期間嘅美股表現。
調查統計1933年以來八位總統執政頭2,000日嘅股市表現，發現克林頓腳頭最好，就任頭二千日美股（1993年1月20至1998年7月12）升咗176%，排第二嘅係美國經濟大蕭條後執政嘅羅斯福，美股（1933年3月4至1938年8月24日）有167%進賬；奧巴馬就以142%升幅排第三。至於被譽為美國上世紀80年代經濟好景最大功臣嘅列根總統就排梗頸四，美股升88%。
三大美股福將嘅共通點，係佢哋全屬民主黨人。統計亦顯示，民主黨總統揸弗期間，美股平均上升132%，係共和黨33.2%升幅嘅4倍。當然，奧巴馬亦有啲運仔，事關佢上任時金融海嘯接近尾勢，美股六周後已衰到貼地開始回升。