淡友想借葡萄牙債務違約發難，我覺得期指唔跌低於22953三幾日，都唔使太擔心，暫仍當上落市看待，既然上落市不如講一講世界盃。
唔少人都講邊場邊場係造波，事實上，睇返賽程表，阿根廷居然一路都未遇南美隊就很出奇，記得有足球圈的朋友同我講，抽籤都有得做。唔係嘛？眾目睽睽下喎，點做？聽講抽籤那些蛋，全部係唔同溫度，一插隻手落去就知邊隊熱邊隊冷喎……咁當然，這類傳聞，聽到都只可以半信半疑，但巴西對德國那一場就嫌疑極大，巴西輸七個一皮，好多人都認定係造波，但多數都係隨口講，冇乜實質理據，我翻看比賽錄影片段幾十次之後，最終睇到個端倪，我估我甚至係最早指出邊個有份整蠱作怪（利申：今屆我鍾意德國多於巴西，並唔係哭波喪）。
費蘭甸奴嫌疑最大
德國入第一球，巴西明顯地犯咗低級錯誤，大家怪罪大衞雷斯，唔mark實梅拿，但我不斷翻看片段後，發現大衞雷斯確實有mark，當時梅拿是在龍門左方，但角球開出前，梅拿走向右面，大衞雷斯就跟唔到，唔係因為佢唔專注，而係因為佢俾隊友費蘭甸奴同埋德國隊的高路斯聯手擋住。當然，高路斯係對手要擋佢，合情合理，但費蘭甸奴都一齊擋，就真係難以明白。大衞雷斯要雙手出力將兩人推開，先至可以殺出重圍去追梅拿，結果，就慢咗一個身位，俾梅拿在無人看管下射入。
我認為效力曼城的費蘭甸奴，一定有問題。當然，大家會話，踢波梗係有衝撞㗎啦，唔一定係有出術，但係我就cap了頭四球的圖讓大家查證（篇幅所限，圖片放在 http://bit.ly/1s1HVBc，大家可逐一驗證，甚至按時間重溫片段），22分01秒，費蘭甸奴漏咗個波畀卻奧斯後，追咗一步就唔追，結果卻奧斯交畀高路斯射入；23分55秒，費蘭甸奴極冇理由之下都踢唔到個波，又漏咗俾卻奧斯，入到三比零；但係咁都仲未夠，去到25分01秒，費蘭甸奴面對自己龍門控住個波，竟然俾卻奧斯喺後面偷咗個波，紀錄拉開到四比零。上半場巴西輸五球，入面起碼四球同費蘭甸奴有直接關係，其他人唔敢講，但佢就應該有問題。
有些朋友會講，就算係造波，都唔使贏咁多嘛？二比零都夠啦？但其實要知道，德國同巴西本來係五五波，無論邊隊贏，莊家都只係賺水；要真正贏大錢，就要靠波膽。事實上，我估計今次莊家殺晒全球99%的波膽，講緊係天文數字。唉！救命，雖然嬲，但都未必怪得晒費蘭甸奴，點知人哋係唔係有家人被「鉗」住，怪只怪場外賭注太大足以影響場內的事情。
金融市場又何嘗唔係一樣？股市莊家搭棚，喺賭波未盛行之前都已經有，而隨着「場外」市場越來越龐大，場外市場對場內的影響亦越來越唔可以忽視，事實上，早幾年港交所（388）推出收市競價盤，本來係想減少股市收市前被操控的情況，之不過，當場外注碼龐大的時候，收市競價盤反而成為另一個操控工具。無奈之餘，只有努力武裝自己，反正局就幾時都有，最重要係你拆到個局，考慮埋場外的因素，知道大鱷想點，咁都可以做鱷魚虱乸。股場拆局賺錢無可厚非，但套用咗體育就失晒意義，因為體育唔應該係賭博，成場比賽淪為一場戲，咁睇波仲有乜意義呢？
張士佳