被謔稱為CCTVB嘅無綫新聞，雖然唔少前線記者都默默努力，希望突破限制，奈何極權話事人點會輕易將講真相嘅報道出街？噚日有個TVB記者去採訪工聯會「反暴力反拉布」遊行，問咗個阿姐點解參加，阿姐答話因為自己「反中央」、錯答支持「張融」方案，呢段片網民瘋傳。聽聞CCTVB新聞部話事人「花哥」袁志偉，知道呢個街訪出咗街勃然大怒，下令要「抽走阿姐」，認為呢個街訪抹黑北京，令噚日午間新聞同6點半新聞唔見咗呢個街訪，改由另一遊行人士批評有議員如同爛仔，工聯會吳秋北、愛港之聲高達斌亦有得發聲。花哥呢種河蟹做法，據聞令到好多人不滿，因為段嘢係個被訪者自己講，根據唔存在編採出錯。好彩港台主持羅啟新將未被河蟹嘅「張融」街訪留底，怪不得有逾3,500人透過佢facebook「些牙」咗，羅啟新提醒阿姐，遊行要記住背熟啲答案囉。