噚日舉行嘅城市論壇，無啦啦俾人「佔領」講台，唔通想騎劫大氣電波？喺7.1當日，唔知香港電台係咪都早有呢個顧慮，突然間加派咗一批兼職保安員駐守，連電台直播室門外，都由保安員把關，氣氛都幾奇異吓。有港台中人同八方講，7.1當日，港台辦公室突然多咗幾個臨時保安員，除咗有人守住門口，喺大樓裏面嘅直播室，亦都如臨大敵，有保安員擔定凳仔，駐守直播室門外，有港台員工見到，都覺得奇怪，心諗，唔通7.1當日會有人佔領港台，騎劫大氣電波搞革命？但回心一諗，呢班臨時保安，大都係手無縛雞之力嘅伯伯嬸嬸，咁如果真係有啲乜事，究竟佢哋又會起到乜嘢作用呢？