聽日就係香港拳壇「神奇小子」曹星如27歲生日！噚日佢去到尖沙嘴，出席周六喺澳門威尼斯人舉行嘅「皇者之戰」記招，為自己爭14連勝，同一班擂台女郎一齊造勢；之後佢仲同一班「星粉」喺DEF拳館會面，仲有神秘嘉賓吳彥祖（Daniel），佢同星如講一句：「My heart will be there」，鼓勵語一出，星如即刻充滿力量！
近期因屋企有白事，一直低調嘅Daniel，噚晚喺星如粉絲見面會時突然出現，同星如份屬師兄弟嘅佢，知道自己禮拜六冇時間去澳門捧場，所以特別同星如講：「My heart will be there」 ，仲話會全心全意喺遠方支持星如嘅比賽。
雙拳無恙 高呼「掂呀」
如果大家有跟星如嘅比賽，應該仲記得5月底喺威尼斯人對泰國諾查剎時，俾對手打爆鼻兼打腫雙手，好彩最後都爭到13連勝；事隔個半月，星如啱啱先喺菲律賓訓練完3個禮拜返港，見佢重拾陽光男孩笑面，問到傷勢，佢二話不說就答：「掂呀！」
對於本周六對印尼巴賈瓦（12勝6負6K.O.）嘅118磅6回合比賽，聽日生日嘅星如坦言開心：「聽日生日都係要為減磅節食，生日都係食蔬菜沙律為主，但以往我打開115磅，今次打118磅，我只係差大約11磅，比以前輕易得多。」星如粉絲如果想去澳門為偶像打氣，可到香港快達票買門票，80至4,680元門票現正有售。
【依波Live】即睇直播：
http://worldcup2014.appledaily.com/match/live
http://bit.ly/EballLive