四年一度的世界盃，是全民參與普天同樂的運動賽事，明日凌晨三時上演的決賽——德國對阿根廷，大家且放下成見，亦毋須介意「忽然球迷」上身，盡情預測哪隊登上王者寶座。本報娛樂版訪問了三十位來自不同界別人士，且看識波的長毛叻，還是堪輿學家李丞責準。
採訪：蘇芬妮
德國陣營
張家輝（男星）
【1:0】
呢兩隊都係我賽前心水，估唔到會係決賽對壘。照秤我會鍾意德國多啲。通常呢啲大賽入球唔會多，大家都係等一個機會就夠。
郭富城（男星）
【2:0】
我覺得德國會以2：0贏阿根廷，上一場大勝巴西7：1，殺得勝起，士氣咁好，射手多，整體好，贏阿根廷兩球應該冇難度。
黃曉明（男星）
【3:1】
德國對巴西這場贏得實在精采，所以我覺得德國整體表現比阿根廷佳，我認為德國喺90分鐘內以3：1勝阿根廷。
林雪（藝人）
【0:0（德國12碼贏）】
去到決賽大家都好小心，而且兩隊嘅後防都OK，所以會估120分鐘打和，12碼德國贏。
八両金（藝人）
【3:1】
上場巴西對德國時，我已經睇好德國，但冇諗過巴西輸得咁離譜，德國越踢越勇，決賽我睇好佢會贏兩粒。
鄭秀文（女星）
【2:1】
我都係睇好德國小勝阿根廷2：1啦！德國表現一路都係好平穩，極少要射12碼分勝負，反而阿根廷就好睇個別球員嘅狀態。
DaDa（陳靜、藝人）
【1:0】
荷蘭輸咗都好失望，不過今次會睇好德國可以贏1：0，經過巴西輸咁多之後，大家都會好小心踢，唔想輸第一球，睇嚟都係悶戰一場。
劉心悠（女星）
【5:3】
決賽真係好難揀，我覺得德國攻擊力強，又有體育精神，但係我又鍾意美斯，家輝同佢好似，哈哈！
周秀娜（藝人）
【2:2（德國12碼贏）】
德國嘅紀律好好，我又不嬲好鍾意阿根廷，好難揀，可能要射12碼，但最終應該德國贏。
LuLu（動燈女神)
【2:0】
我由第一場撐德國到尾，最近呢幾場睇番，阿根廷係唔識入波，相反德國隊嘅前鋒同中場都識入波。
美心妹妹（童星）
【6:5】
我有德國波衫，我支持佢哋贏阿根廷，德國咁勁，佢哋會6：5贏阿根廷。
徐濠縈（名人）
【2:1】
我唔係好睇波，不過都有留意吓，聽講今屆德國踢得幾好，所以我估德國贏。阿根廷有美斯？我唔識啲球星呀。
謝婷婷（名模）
【2:0】
我唔夠資格講阿根廷晉級係咪正常賽果，但係我諗決賽佢哋對德國會好好睇。之前德國對法國我都估德國贏，決賽都係一樣。
梁安琪（名人）
【1:0】
好難估，自己比較鍾意德國隊。
陳栢熹（名人）
【3:1】
德國個勢好，呢樣嘢好重要，腳法好好，攻勢精密，攻守都掂，佈局又出色。
阮馬素（德國運動員）
【3:1】
德國人當然捧德國，德國人有紀律性可以打到教練嘅部署，最想決賽舒偉恩史迪加同拿姆可以入波。
小美（郭富城經理人）
【5:3】
因為兩隊都有入球實力。所以我相信各有入球係必然嘅。而德國嘅表現神勇，所以我睇好有五球以上。
龍小菌（歌手）
【2:1】
我估德國贏，因為阿根廷好似只得美斯一個，美斯踢咁多場都辛苦啦！所以對住德國會係一個惡鬥。
李丞責（堪輿學家）
【沒有提供】
1954甲午馬年、1990年庚午馬年，德國均奪冠，今年再遇甲午馬年，加上德國球衣白色屬金，最終玄學分析德國今奪冠都機會較高。
柳俊江（專欄作家）
【0:0（德國加時贏）】
阿根廷其實好一般，冇乜霸氣。我估計都係防守戰，未必好好睇，但加時我估德國會佔優，可以KO對手。
阿根廷陣營
梁詠琪（女星）
【1:2】
我估阿根廷贏2：1，美斯一直都係巴塞嘅主將，而且係舊年全球最佳球員，連阿根廷隊長都係巴塞嘅球員，所以我都非常期待呢一場賽事！
古天樂（男星）
【0:1】
我始終比較鍾意阿根廷，只要美斯發揮得好，阿根廷未必唔可以打贏德國，但我認為90分鐘內，阿根廷有機會1：0小勝德國。
長毛（梁國雄、政界）
【1:2】
其實德國都係踢咗一場好波，就係對葡萄牙嗰場，未真正受過考驗。況且南美洲搞世盃，都係南美洲球隊贏。
何超瓊（名人）
【1:2】
一向我都捧阿根廷，知道佢一定贏硬，所以四強都冇睇，我都知德國難打。唔係捧美斯，我冇特別睇球星。
黃美棋（藝人）
【0:2】
我睇好阿根廷，因為上場德國對巴西嗰場7：1贏得太盡，凡事太盡都唔好，所以我想阿根廷贏，只係直覺同唔想德國贏。
陳志雲（商台高層）
【2:3】
我估90分鐘阿根廷贏德國3:2，因為我好鍾意阿根廷風土人情，仲先後去過兩次。反而德國我唔係咁熟，所以會撐阿根廷。
黃夏蕙（藝人）
【1:2】
我睇好阿根廷贏德國，阿根廷咁紅，我梗係寧買當頭起啦，不過德國都唔弱，所以阿根廷會贏2：1。
魯芬（藝人）
【0:0（阿根廷12碼贏）】
阿根廷對德國真係勢均力敵，我覺得佢哋會0：0，但阿根廷勝在運氣好，係會攞今屆世界盃。
吳家麗（藝人）
【1:3】
梗係捧阿根廷，因為我好鍾意美斯，由佢第一次踢世界盃開始已經好勁，可以係中場扭過好多個。
區仲德（堪輿學家）
【1:2】
阿根廷今年有兩粒吉星照住，流年得利，絕對會行大運，阿根廷必勝，波膽係2：1。
【依波Live】即睇直播：
http://worldcup2014.appledaily.com/match/live
http://bit.ly/EballLive