現年52歲的杜德偉，樣貌以至身形都具備「美魔男」條件，原來他20出頭已開始「防腐」保養，他說：「男人最慘大肚腩同甩頭髮，咁會冇晒自信。」杜德偉自問非得天獨厚，只因受「爆肌哥哥」杜德智影響：「哥哥自細練到成身肌肉，以前一齊喺加拿大生活，佢健康飲食習慣洗咗我腦，又為我度身訂做一套體能訓練，我一直keep住。」
杜德偉不煙不酒，連零食都不入口，煮食少鹽少油，每餐必多菜少肉。對於弗爆身形，他最滿意天生幼腿：「膊頭、胸肌同腹肌都可練番嚟，小腿係爹哋遺傳，連沙麗（葉蒨文）都羨慕。」杜德偉下月16及17日在紅館舉行兩場演唱會，近日已閉關操練：「希望將爆炸力發揮喺舞台，加埋音樂元素，等觀眾滿載而歸。」
美魔男健康餐單
【早餐】
糙米飯一碗、烚菜、任何肉類
【午餐】
糙米飯一碗、烚菜、雞或豬或蒸魚
【下午茶】
全麥多士一片
【晚餐】
糙米飯一碗、烚菜、任何肉類，但份量減半
P.S.
晚餐必須睡前4小時前進食，如飯餐有沙律，一定在吃飯前先食。如在街外吃碟頭飯，會要求飯餸分開。