堂堂足球強國兼5屆世界盃冠軍巴西，上周二世界盃準決賽主場出擊都俾德國數七個一皮，好多球迷都接受唔到囉；假波傳聞亦都滿天飛，傳吓傳吓傳到前鋒尼馬扮傷，包括入院片段，右手手臂紋身唔見咗；事件隨時演變成98年世界盃決賽，巴西前鋒朗拿度突然水準大跌watt咁，成為另一單世界盃千古懸案。
手臂紋身離奇消失
巴西準決賽大敗予德國，前鋒尼馬因傷缺陣當然有好大影響，佢喺8強俾哥倫比亞後衞辛尼加踢傷腰椎，更加幾乎癱瘓㖭。不過哥倫比亞電視台心水好清，佢哋翻查到尼馬8強賽後入院片段，醫護人員用擔架抬尼馬由救護車入醫院時，雖然瞓喺擔架床個位仁兄，身材同髮型都好似尼馬，但露出右手手臂，竟然冇咗紋身，認為呢位仁兄唔係尼馬；更有報道指，巴西足總發放嘅尼馬受傷X光片，傷患處更加只屬舊患。
不過話分兩頭，就算呢位仁兄唔係尼馬，咁可能只係巴西足總嘅刻意安排，等傳媒追訪呢位替身，畀尼馬專心養傷，未必等於尼馬扮傷；而且巴西為咗要準決賽大戰德國時，安排絕對主力因傷缺陣，白白失去捧盃機會，巴西有冇咩着數？每每去到呢個關頭，大家都不期然諗起打假波、莊家操縱賽果等傳聞，但巴西用全國嘅榮譽作賭注嚟踢場假波，似乎可信性都唔係好高。
森巴假波大哨最可疑
講真，巴西世界盃假波懸案都唔少，98年世界盃決賽已經係經典，當時主力前鋒朗拿度就傳出身體出現問題，不過同尼馬唔同，大哨就仍然有上陣，尼馬就缺陣。結果大哨全場神不守舍，巴西亦都以0:3大敗畀法國；事後就傳出好多版本，好似話意大利黑手黨捉咗大哨屋企人，逼佢打假波令巴西輸，又有傳大哨賽前抽筋，搞到狀態大跌，但因為贊助商一剔要求，巴西仍然要派大哨上陣。連港產片《賭俠1999》都將呢啲傳聞拍成電影，導演晶哥又不如再拍《賭俠2015》，將尼馬缺陣之謎拍成電影啦！
【依波Live】即睇直播：
http://worldcup2014.appledaily.com/match/live
http://bit.ly/EballLive