勝者為王，邊個有得留低？巴西世界盃決賽今晚深夜上演，喺尖沙嘴海傍嘅《Winner Stays》4人足球賽，今日晏晝兩點起亦將會決出多組王者。一班小港腳雖然要喺兩小時嘅困獸鬥爭冠，但就話明為咗睇波必定去到盡，有信心捱眼瞓睇完季軍戰都可以捧盃！
世界盃期間人人變晒熊貓眼，對一班仲要比賽嘅《Winner Stays》球員嚟講，都咪話唔辛苦。世盃季軍戰前夕，噚日喺香港文化中心廣場外，就有近百名參賽者合演各組準決賽，每組約10支隊伍要喺兩個鐘內車輪轉對碰，能夠喺限時5分鐘內勝出嘅，就可以繼續留低，換言之球技好嘅隨時要踢足10場，體力要求有番咁上下。
小港腳播磨浩謙、余煒廉、何誠淵同埋歐文洛，噚日朝早喺蒲崗村練完波，晏晝再代表傑志青年軍出戰U17準決賽，都能夠贏咗5場，殺入今晚6點半展開嘅決賽。烈日下踢到流晒汗，但難得可以喺海傍比賽，隊長余煒廉就話好enjoy：「場次多，龍門又細啲，踢4人賽其實仲辛苦過踢11人，好彩聽日（今日）夜晚先比賽，點都要睇埋季軍戰先休息。」
球迷免費玩埋一份
至於U12組別噚日就率先上演表演賽，最終由踢咗9場嘅太陽飛馬青年軍勝出。呢班小豆丁就話難得放暑假，都會把握機會睇埋季軍戰。其實除咗球員有得踢比賽，公眾今日都可以喺12點前到場報名試踢，名額就當然係先到先得啦！若果遲得滯報唔到名，都可以喺鐘樓旁免費玩3個mini games，或者喺賽場旁嘅Risk Everything影返張型仔相，感受吓世盃足球狂熱。
【依波Live】即睇直播：
http://worldcup2014.appledaily.com/match/live
http://bit.ly/EballLive