捱咗咁耐夜，終於等到今晚世界盃嘅最後一戰，雖然今晚兩隊都唔係我嘅至愛，但話晒都係王者爭霸，無論點都要捧場嘅。
我就比較睇好德國嘞，因為佢哋嘅中場馬里奧葛斯係基斯坦奴朗拿度之外，我另一位好Like嘅球星，咪睇佢20歲出頭，又沒有6呎高，其實佢靚仔得嚟又好波，喺場上唔單止有超凡嘅閱讀球賽能力，而且控、傳技術仲好好㖭，勁到連德國名宿碧根鮑華都點名讚過佢，你話今晚係咪要落足眼力，睇吓佢有幾勁表現先。
世界盃就踢埋今晚，而我今日都會踢番場「The Last Game」，我講緊嘅係Winner Stays呀！我哋嗰組今日就決賽嘞，我就肯定要攞走個冠軍嚟送比自己做生日禮物㗎喇！所以就算係生日周都好，我都推晒啲friend，暫停晒所有慶祝活動，日日同啲隊友加操。不過隊友都好有我心，特登去買咗個蛋糕嚟同我慶祝（圖），真係多謝晒！
前兩晚我同隊友就一齊去咗尖沙嘴海旁度跑步，一路跑一路睇住對面海嘅中信大廈播番我哋啲型仔相，嗰刻感覺真係超正！文：許家樂
【依波Live】即睇直播：
http://worldcup2014.appledaily.com/match/live
http://bit.ly/EballLive