今場決賽執法嘅球證，係42歲嘅意大利判官列素利。佢之前已經喺阿根廷晉級之路吹過兩場波，分別係分組賽對尼日利亞同8強對比利時，結果阿根廷喺呢兩場波都順利喺90分鐘內搞掂對手，唔知今場再由佢吹，會唔會為阿根廷帶來好運呢？
奧斯爾賽前爆賄賂警察
德國中場奧斯爾決賽前夕突然惹官非，事緣佢今年2月喺北倫敦唔小心揸車撞親一名攝影師，但佢事後涉嫌用波飛嚟賄賂差佬，以私人包廂畀佢哋入場睇阿仙奴對新特蘭嘅英超比賽，希望可以逃過罰款或停牌。𠵱家單嘢揚咗，相信佢面臨嘅控罪可能仲大鑊，唔知會唔會影響佢嘅備戰呢？
一場決賽逾200彩池
就住呢場萬眾矚目嘅世盃決賽，外國博彩公司開咗好多特別項目嘅賠率，等啲賭仔可以盡情賭盡佢。好似威廉希爾就開咗成200幾個注項，有好多種玩法，例如你可以賭湯馬士梅拿先入波但阿根廷贏，咁就有成81倍，亦可以賭佢入波之後，場波和波收場；不過足智彩呢？就少啲囉！
沙比拿最後一戰
無論阿根廷贏唔贏到決賽，教練沙比拿都會喺呢場波之後辭職唔撈。佢嘅經理人盧比斯，喺上周五接受阿根廷電台訪問時證實呢一點，仲話沙比拿喺高𥧌時退落嚟係最理想嘅決定。59歲嘅沙比拿喺2011年時接掌阿根廷，帶領國家相隔24年後再入決賽，據講佢走咗之後，阿根廷足總有意接觸前巴塞隆拿教練馬天奴，或馬德里體育會嘅施蒙尼嚟取代佢。
【依波Live】即睇直播：
http://worldcup2014.appledaily.com/match/live
http://bit.ly/EballLive