搞咗咁耐，果然巴塞隆拿一賣走阿歷斯山齊士，就即刻買蘇亞雷斯。利物浦已經喺周五晚上公佈蘇亞雷斯離隊，據英媒報道，價錢大約係7,500萬鎊（約10億港元）。紅軍喺官方網站嘅聲明亦都感激阿蘇多年嘅貢獻，特別係佢上屆出色嘅表現幫球會勇奪第２重返歐聯，亦都祝佢會有更好嘅將來。
「一世係紅軍球迷」
雖然一早預咗，不過離別總係有啲傷感嘅。阿蘇同紅軍主帥羅渣士分別發出聲明，其中阿蘇就話：「要離開利物浦，心情真係好沉重，因為我同我家人都已經愛上咗呢個城市。但係我最唔捨得嘅都係一班球迷，我永遠唔會忘記，我一世都係紅軍球迷。希望大家可以明白，雖然球會想我留低，不過我認為係時候去西班牙發展。祝紅軍有更好嘅將來，對於幫助紅軍重返歐聯我感到榮幸。再次多謝你哋，你永遠不會獨行！」
而羅帥亦大讚上季成為雙料足球先生嘅阿蘇係一個天才球員，會永遠當佢係朋友。雖然失去阿蘇，但係佢哋會專注喺未來，有信心球隊會繼續有好成績。吸取咗安祖卡路爾嘅教訓，今次紅軍應該會好好善用筆巨額轉會費啩？佢哋之前已經用咗約3,800萬鎊，買咗列基林拔、拉爾拉拿同安利簡恩3名新兵。
巴塞最快10月齊腳
阿蘇將會喺下星期去到巴塞隆拿接受體測，然後就會簽署一份5年嘅合約。巴塞隆拿亦都即刻放咗條片上網，將蘇亞雷斯嘅9號號碼印上，相信佢將會着山齊士留低嘅9號波衫。阿蘇去到巴塞，將會聯同美斯以及尼馬組成「南美三箭頭」。不過呢個組合，最早都要去到10月先有得見到嘞，因為阿蘇俾國際足協重罰國際賽停賽9場，以及4個月禁止參與足球事務，早前上訴失敗，維持原判。加上尼馬喺季初又未必能夠康復，巴塞季初都應該要倚賴喺世盃搏到盡嘅美斯。
而買咗下季紅軍波衫，又印咗阿蘇嘅球迷就唔好彩喇。早前有利物浦球迷搞投票，討論球會應唔應該對買咗阿蘇波衫嘅球迷回水，接近1萬人參加，最後得出嘅結果係兩邊各有約一半人支持。不過紅軍都係決定，冇得回水！
【依波Live】即睇直播:
http://worldcup2014.appledaily.com/match/live
http://bit.ly/EballLive