有港版尼馬之稱的伍文生，力挺巴西有主場之利，一心以為尼馬可以帶領球隊直搗黃龍，怎料8強戰遭哥倫比亞辛尼加一撞導致脊椎骨裂，4強尼馬缺陣，最終以7比1慘敗，輸給德國。港版尼馬伍文生跟巴西球迷一樣，鬱鬱不歡，昨日在大角嘴接受訪問說：「冇辦法，打機至有，現實生活中，邊會有7比1喎，大佬！不過，我個大廚有朋友買中咗，亂買咪中囉！如果唔係邊會中呀！冇可能發生都發生。」
言語間，聽得出伍文生對巴西的不滿，雖然如此，死忠粉絲仍然希望巴西季軍賽可以踢出水準來，他說：「尼馬點解會咁，真係出唔到賽，後衞又唔得要停賽，搞到巴西要踢季軍賽，爭季軍都係要加油呀！因為如果季軍都攞唔到，好多巴西國民會喊，球員都出唔到街，巴西乃係一個足球國家，點可以去到呢個地步，要繼續努力，加油！」
跟外父學沖奶茶
在哭波喪的同時，伍文生最近忙於為即將開張的西式快餐店SHY Xpress打點一切，他說：「其實我嗰時係移民，去咗澳洲，要坐移民監，生埋小朋友，本來諗住喺嗰邊過生活，點知我外父問我有冇諗住試吓飲食界，佢係做舊式茶餐廳，跟住外父做茶餐廳，整蛋牛治，就沖咗一手好好嘅奶茶、咖啡、鴛鴦，學咗到𠵱家三年喇！適逢有個uncle，開茶餐廳想搵幫手，幫咗佢半年又想試吓新嘢，就做咗呢間新嘅西式快餐店，下個禮拜一試業，下月1號就正式開張，希望之後可以開多幾間喇！」
採訪：楊潔雯
攝影：陳俊強
【依波Live】即睇直播：
http://worldcup2014.appledaily.com/match/live
http://bit.ly/EballLive