到嘞！到嘞！世界盃最後兩場生死戰呢兩晚就開波。巴西輸咗已成事實，喺主場入唔到決賽，係就係失望啲，但點都要收拾心情，今晚季軍戰重振雄風，搶個季軍返嚟，安撫吓班為佢哋流咗咁多眼淚嘅球迷。
至於場冠軍戰就算冇咗我撐嘅巴西（圖），我都仍然期待睇德國同阿根廷大鬥法，雖然我過往睇盃賽嘅經驗嚟講，季軍戰點都刺激過決賽，不過呢期興Risk everything嘛，為咗個大力神盃，兩隊點都要show吓啲火畀我哋睇啩，希望最後一戰唔使再睇埋晒啲保守波，期望佢哋拋開包袱、險中求勝，搏到盡先可以殺出一條血路嘛！
踢完呢兩場波，世界盃就曲終人散，但我對足球嘅熱情又點會咁就熄呢！為咗再撻着呢團火，我決定今日殺落去尖沙嘴文化中心嘅Winner Stays度踩場，網上話有幾節係公開試玩㗎，各位腳痕嘅波友到時要把握機會喇。聽講呢兩日仲加咗個新嘢，大家只要喺instagram度tag番自己張相，就可以現場print番出嚟攞走，有得踢又有得玩，你哋仲等咩呀？
文：陳子樑
【依波Live】即睇直播：
http://worldcup2014.appledaily.com/match/live
http://bit.ly/EballLive