肥 頭：餓餓哋，今日食番個小菜套餐先，福嬸，今日有乜靚餸。
福 嬸：香橙鴛鴦蝦球，香橙煎軟雞，同埋橙皮鴨。
肥 頭：嘩，乜味味都係橙㗎，呢排啲橙好平咩？
艇仔張：肥頭，你行入鋪頭，唔見收銀機隔籬個橙陣冇晒貨咩？梗係德叔見荷蘭（圖）出局，叫廚房拎晒啲橙去煮餸啦。
德 叔：我係唔忿氣呀！個死仔洛賓單刀失機，搞到我個冠軍斷咗，大嗱嗱冇咗幾千銀，你哋再嘈我就唔賣奶茶咖啡，淨係賣橙汁。
肥 頭：德叔，唔好咁嬲，場波都踢完幾日啦，不如諗吓場季軍戰，點樣贏番啲錢好過。
艇仔張：睇你個款都唔會繼續撐荷蘭㗎啦。
德 叔：你當我份人咁冇本心㗎咩，我會繼續買荷蘭，你睇巴西上仗踢到死晒狗咁，點贏呀。
肥 頭：不過雲高爾講明季軍戰冇意義喎，而且應該派好多後備兵上陣。
艇仔張：其實你哋又唔好咁輕視荷蘭班後備兵，而且唔少係年青有潛質新星，好似佐迪卡斯、迪比等，德叔都唔係冇道理。
艇仔張：其實呢場波最好賭應該係入球「大」，最衰免費台冇得直播，唔係一邊睇一邊賭，追番兩、三注「大」都好。
肥 頭：不如咁啦，你買半打啤酒上我屋企一齊睇啦。
德 叔：預埋我喎，最多我拎支橙汁上嚟啦。
人物介紹：
德叔 旺角茶仔老闆
肥頭 吹水怪
祥Hi 肥頭屋村老友
福嬸 茶餐廳侍應
艇仔張 扮專業賭友
大食肥牛 賭精一名，命中率甚高
【依波Live】即睇直播：
http://worldcup2014.appledaily.com/match/live
http://bit.ly/EballLive