睇沙膽虹專欄（七月八日）講「古董鼓勵屠殺？」先知道正在尖沙嘴藝術館展覽嘅「長青館藏明清瓷、玉、角、竹、畫琺瑯」，竟然有人拉隊去示威抗議，要求康文署撤走展覽品中之犀牛角、象牙雕刻品，理由係「藝術品背後係一個血腥謀殺」，示威組織就係「保護野生動物組織」Wild Life Risk及「香港人道教育聯盟」。
呢類保育環保組織，不知從何而來，如陶傑所言，西方國家近二十年時興講政治正確，最初以平等、反歧視之名出之，後來又擴大到平權、保護環境、保護動物，諸如此類，多到數不勝數，直至最近，法國先至有針對性、「侵犯宗教習慣」之措施，禁止法國人民在公眾場所戴上黑紗面罩，但歐美亦間中出現一啲極端「保護XYZ」嘅組織，採取暴力行動，攻擊佢地界定為違反「保護XYZ」嘅人士。
長青館今次在藝術館嘅展覽，左丁山有去睇過，清楚記得喺「犀角及象牙」藏品展覽部份，一開始就俾隻素身犀角杯（15世紀，長20.3厘米，闊8.9厘米）所震撼，左丁山對藝術品係門外漢，認識遠遠不及沙膽虹，但自問亦識得何謂美醜嘅，「長青館」所藏之犀角有十七八件，象牙雕刻有象牙觀音、象牙八仙兩款，皆屬精品中之精品；展覽品畫集內，有名家介紹展品，前中文大學文物館館長林業強所寫之「昌南遺韻── 漫談長青館藏明清官窰瓷中的人、地、事、物」一文，長達萬字，有詳盡註釋，直情係一篇中國藝術史學生必讀嘅論文。因有人反對象牙與犀角，左丁山特別找尋名家文字，一篇Rosemary Scott女士所寫嘅Aesthetic Appreciation and Scholarship（55至67頁）有提到象牙八大仙，以差不多一頁紙嘅篇幅描述象牙八大仙，有讚冇彈，另外一篇鄧民亮先生嘅文章：「長青館藏．精美奇趣」（68至72頁）亦有提及「犀角」及「象牙」，講述犀角自鄭和下西洋後，從南印度、爪哇、非洲輸入，象牙係明代中後期貿易貨品，歐洲人提供圖樣，廣東及福建漳州工匠按圖雕刻，今次展出嘅象牙觀音充份顯示出當時之中西文化差異。參觀展覽，最好有欣賞藝術嘅心情，西方人獵殺象牙犀角有千幾年歷史，禁殺只係近二三十年之事，用今天眼光尺寸批評幾百年前事物，不符政治正確之道，等同搵交嗌，如沙膽虹所言，你有你在外派傳單，我有我入內參觀，好唔好？