勒邦占士同熱火總裁萊利喺拉斯維加斯傾完一輪都係冇結果，消息人士就話，原來大帝已經決定咗要返騎士。啱啱喺賭城搞緊籃球訓練營嘅大帝，會先同老友獲迪齊齊飛返邁阿密，佢之後就會轉飛去巴西，睇德國對阿根廷嘅世界盃決賽；據講佢會喺出國前正式公佈第2次「The Decision」。
占士4年前第1次做嘅「決定」傷盡克里夫蘭人心，仲成為全城公敵，如果今次真係浪子回頭，相信市內人民會當佢神咁拜。不過，熱火球迷就可能會對佢恨之入骨喇。講真，雖然熱火為咗討好大帝而搵咗佢盛讚嘅新秀控衞尼比亞加盟，但眼見隊波個陣殘到咁，都幾難𠱁得掂佢留低。
相反，大帝母會騎士就吸引得多喇，上個月喺選秀大會揀咗有「新T-Mac」之稱嘅A域堅斯，而周四亦正式公佈同K艾榮續咗約，同日亦已經一口氣送走晒積克、卡拉斯夫同T薩拿，絕對有條件開出大帝應得嘅頂薪合約。前場由大帝帶領，後場就有K艾榮同韋達斯兩位新人王，仲有個2、3號位都打得嘅新秀狀元A域堅斯，呢個組合淨係諗吓都覺得興奮。若然新球季真係湊成呢個黃金陣容，就算水貨狀元班尼特仍然打唔起，但喺大師兄占士嘅領導下，騎士絕對有能力挑戰總冠軍。
23號旋風訪港
雖然大帝嘅「決定」一日未公佈都仲係未知之數，但已經落實嘅係，佢本月23號就會旋風式駕臨香港，出席一剔牌嘅籃球推廣活動。活動內容包括親子訓練同埋宣佈品牌「RISE Challenge」選拔嘅勝出者；想見大帝一面嘅球迷就要mark低資料喇。
【依波Live】即睇直播：
http://worldcup2014.appledaily.com/match/live
http://bit.ly/EballLive