新鮮出爐溫網男單冠軍迪祖高域同青梅竹馬嘅大肚女友列絲迪，今周將會進行大婚，延續幾日前啱啱再奪大滿貫嘅喜氣。佢哋周二傍晚就搭私人飛機，到咗黑山嘅小島預備婚禮。
捐出婚禮報道收益
迪祖同模特兒女友列絲迪呢場愛情長跑跑咗接近9年，喺上年9月終於公佈婚訊，今年4月更加宣佈有喜；佢哋原定喺6月14號結婚，但係迪祖為咗喺溫網爭取個人第7個大滿貫錦標而臨時決定延遲婚禮，不過明白事理嘅列絲迪就好支持對方嘅決定，終於迪祖就喺決賽贏咗草地天王費達拿，以冠軍獎盃作為結婚禮物。
雖然呢對金童玉女喺塞爾維亞受歡迎程度拍得住英國嘅威廉王子同凱蒂，但係佢哋就非常低調；而一向樂於行善、有個人慈善基金幫助喺弱勢社區成長小朋友嘅迪祖，就一早表明禁止國內傳媒報道呢場世紀婚禮，獨家報道權仲以幾千蚊歐元賣出，收益當然係全部捐晒畀慈善機構啦。
美網又加獎金
將會喺島上著名嘅皇后沙灘進行婚禮，而場地周日起已經被封，開始搭建帳蓬同其他臨時設施。據講當日會有百幾位賓客見證呢對情侶拉埋天窗，包括迪祖嘅一眾網球圈好友好似伊娃諾域、積歌域同舒拉寶娃等等，而男單「四大天王」之一嘅梅禮更加盛傳會做伴郎㖭。喺沙灘舉行咗一個簡單而隆重嘅浪漫婚禮之後，信奉東正教嘅迪祖據報周末會同列絲迪再喺教堂行禮，跟足傳統。
之前話會休息一陣嘅迪祖，好快又要為8月底展開嘅美網備戰。美網賽會周三就宣佈，今屆比賽嘅男、女單冠軍分別會攞到300萬美元（約2,310萬港元）嘅獎金，即係加咗40萬美元，而所有單、雙打共5項比賽合計嘅總獎金亦提高至3,830萬美元，比上年多11.7%。就快做老竇嘅迪祖，為咗奶粉錢一定搏盡，贏個冠軍賀BB出世。
【依波Live】即睇直播：
http://worldcup2014.appledaily.com/match/live
http://bit.ly/EballLive