【大坑】蔡穎恩（Evelyn）自從同舊愛Mr.成員Tom分咗手之後，感情方面都未有乜嘢着落，雖然期間有傳佢同插畫師小克撻着，但原來Evelyn嘅真命天子，查實係另有其人！
輕摸男友下巴
似乎對咖啡情有獨鍾嘅Evelyn，之前都試過俾人影到同緋聞男友馬志威喺coffee shop撐枱腳，估唔到喺前日下晝5點幾，Evelyn同一個男仔喺大坑又一人揸住一杯咖啡出現，着住件寫咗NOTHING T恤嘅Evelyn，肯定同個男仔唔係nothing，事關見到佢哋沿住銅鑼灣道行向天后方向，睇見佢哋拖晒手咁行，態度親䁥，行到人多嘅地方，就算佢哋有啲避忌咁鬆開手，但係Evelyn都忍唔住用手輕摸男友嘅下巴，而且仲邊行邊傾，認真sweet到爆！
Evelyn以前同阿Tom拍拖都好少拖手，唔知係咪因為呢個係圈外人，所以可以好free咁享受拍拖生活，但話晒呢段戀情仲未曝光，所以Evelyn嘅警覺性都好高，眼中都唔係淨係得男友，見佢不時好小心咁左望右望，似怕被人認出，不過百密都會有一疏！
採訪、攝影：唐寶妮
