巴西對德國當晚，大把師兄弟請定假。當時，如果你老細都未瞓，其實你可以凌晨四點半打電話或Email消假，因為，原本要個半鐘搞掂嘅嘢，6分鐘內已經完成。同樣情況發生喺辦公室，你叫有效率；如果發生喺時鐘酒店，你叫嘥波鐘（直接啲叫冇X用）；但如果係殘廁Gathering，你就係達人。
喺巴西最黑暗、被連入四粒嘅六分鐘內，識得有朋友去咗煮個麵、大個便，而組合C All Stars監製去咗執少少隻新歌，而再睇電視嘅時候，已經係五比零，仲癲過王晶套《賭俠1999》叫張家輝扮朗拿度一幕。六分鐘入四粒，結局七比一，又係六四、七一。
而睇咗七屆近三十年巴西嘅我，見到呢啲「一橫一直」、「四十歲前巴西都係春天」嘅場面，彷彿再領悟到佛家「成住壞空」、道家「天道無常」、伍晃榮「波係圓嘅」、阿叔「打咗電話畀福士」等等。
送《苦巴》畀大家，原曲《苦瓜》：「就像我一直看巴西從未沾濕眼角，仔細地看球壇裏傳聞甚麼鬼盤對德國，卻在某蕭瑟處暑深夜，忽爾明瞭了，而球裂便碎落。今天先記得聽過人說今屆踢得差，那意味着呢班馬年輕不會亂插花，到大悟大徹啤酒轉飲清茶，花生會食崩隻牙，我共你覺得呢仗，小喇叭！」
文：梁柏堅
【依波Live】即睇直播：
http://worldcup2014.appledaily.com/match/live
http://bit.ly/EballLive