瑞銀前中國區主席兼總裁、瑞銀證券董事長李一，將會過檔摩根大通做中國業務主管，10月履新。
李一係接替原中國區主席兼行政總裁邵子力嘅職務，負責中國所有業務同產品，直接向亞太區主席兼行政總裁歐冠昇滙報。李一喺瑞銀做咗9年，有份成立瑞銀嘅中國券商瑞銀證券，係瑞銀證券開荒牛。
邵子力早喺今年4月中調任為摩通亞太區副主席。而原本嘅亞太區副主席，係今年3月辭職、5月被指捲入摩通藉聘請內地官二代獲取生意等不正當利益而遭廉署拘捕嘅方方。
摩通早前捲入美國司法部嘅反貪調查，美國質疑摩通聘用內地高官同企業高層嘅子女換生意，其中有指摩通取得與光大集團有關嘅生意，跟聘用光大董事長唐雙寧個仔有關。方方就因為呢單嘢喺3月辭職。