妖冶（Flirtatious），通常都係邪中帶索有啲Sexy feel，衣着品味有一定水平，咁先有flirt人嘅條件，所以當長毛日前話立法會內有女議員打扮好「妖冶」，唔少人即時打個突，望勻都唔見有妖冶女神；而唔少立法會女將，噚日仲將自己包到密密實實，刻意以莊重look出場。被問到有冇妖冶feel？個個耍手又擰頭，差在未走夾唔唞！
卿姐笑住話：你去死啦
做「女」時曾經時髦到着吊帶裙現身電視報新聞嘅劉慧卿，噚日以一身綠藍鬆身衫亮相，配埋一對大耳環，引述黨友黃碧雲大讚佢呢身新打扮。八方即時問佢覺唔覺得自己妖冶？卿姐鬼馬嘻哈笑住話：「你去死啦！哈哈」，之後絕塵而去。
藍色配黑長裙，公民黨毛孟靜噚日打扮好斯文，佢話喺佢字典中，妖冶係貶義詞：「令我諗番起美國經濟大蕭條後，經濟好番時啲女人極盡奢華嘅打扮。」日前對號入座嘅鼠王芬，噚日就將黃襯白西裝褸着上身，冇再着惹長毛「遐想」嘅半截裙，改以長褲示人。鼠王芬話自己衣着冇問題，仲以「穩陣」嚟形容。俾人話妖冶？佢話自己好講得笑，唔會將事件放喺心。
成日去名店掃貨嘅新民黨葉劉淑儀，噚日再以意大利黃外套襯貼身白色衫OL look出動。雖然盡顯身材，但唔肯對號入座，認定去年獲《君子》雜誌（Esquire）選為最性感女神嘅Scarlett Johansson先至稱得上妖冶。黑搭灰沉實系嘅民建聯李慧琼，以「我冇條件」回應係咪妖冶；前日落淚鬧爆建制派嘅工黨何秀蘭亦一身黑look，自嘲「黑口黑面襯晒色」。
查實呢次妖冶風波，係因為長毛不滿曾鈺成唔畀佢着短褲而話有女議員妖冶，地產界代表石禮謙08年都試過以短褲look現身立法會，佢話呀，佢條褲係Bermuda shorts，絕對係莊重，仲話妖冶嘅英文係Flirtatious喎，似乎暗示會內冇人合條件。
李八方
mailto:[email protected]