世界盃接近尾聲，除咗巴西被德國狂數七粒，令全球球迷倒抽一口涼氣外，大部份賽果正路，冠軍對決德國對阿根廷，牌面日耳曼民族秤高啲。從欣賞角度，今屆賽事唔算精采，可幸嘅係科技進步，對視覺要求唔高的，可以攤係床用手機或板腦睇，較往昔方便。忽發奇想，家陣智能眼鏡技術發展方興未艾，到下屆世盃時，戴副超就有超感觀感受睇波，應該雖不中亦不遠矣。
人心思變，福禍難料。之前說個幾次，金融海嘯後，係政治壓力下，各國亦多咗用有形之手干預市場。好比最近，一直抗拒設定最低工資的德國，本月初亦破天荒say yes，明年起當地打工仔時薪規定最少有近90蚊港元，令到未有設定最低工資的歐盟成員國買少見少，現時得返半打咁大把。設立最低工資對社會係好定壞，專家冇定論，但此舉必然會遏抑營商選擇的自由。以本港為例，推行最低工資後，唔少行業都請不到人，其中以飲食業最明顯，聽講由於工資相若，好多人寧願做物業管理都唔做飲食，而家去茶樓食飯好多時都要等好耐都冇人招呼，最低工資對低收入人士表面有幫助，但從社會整體利益而言，條數冇計到。
道指上周首破17000關，部份好友畏高止賺，令大市周初回吐1%左近，禮拜三聯儲局公佈的會議紀錄，顯示10月會結束QE3，但未有暗示提早加息，刺激美股反彈78點。不過，到噚日執筆時，法國和意大利公佈嘅製造業數據肉酸，適逢葡萄牙第二大銀行Banco Espírito Santo母公司有筆短期貸款未還，歐洲股市中段曾跌逾1%，避險因素刺激下，金價昨日曾升至四個月高位，見每盎斯1,344美元，今年累積升逾一成。
歐元硬淨 貶值靠干預
滙市個邊，市場避險意識上升，抵銷聯儲局會議紀錄內容不利美元的影響，美元昨日先跌後穩，並打窒紐元闖新高條氣。評級機構惠譽上調新西蘭AA級的評級展望，刺激紐元昨日升至88.38美仙，與2011年高位緣慳一面。雖然葡國單嘢阻頭阻勢，但紐元破頂機會仍然唔細。意大利和法國製造業數據差，加上葡國因素利淡，但到執筆時歐元仍未倒跌，企穩1.36美元，反映即使歐洲央行上月減息及出動負利率，歐元強勢仍金槍不倒。個人相信，即使歐洲央行推量寬（現時看機會不高），歐元仍未必跌得落，要大幅貶值，入市干預才行得通。
日圓昨日向上，除了避險因素，美國國債孳息下跌是最大原因，10年期國債孳息昨日曾跌至2.5厘，令美日息差收窄，若葡國危機蔓延，美元恐怕要下試100日圓水平。
奇兵
本欄逢周五刊登