「賭后」何超瓊十分響應阿爺話要喺澳門整多啲非博彩娛樂，繼之前喺旗下美高梅酒店嘅「美高梅展藝空間」搞咗個文藝復興畫展後，𠵱家又「請獅入澳」，將源自法國里昂嘅「獅子雙年展」帶到澳門。
呢個叫做「獅子雙年展」嘅展覽，過去幾屆分別喺法國、意大利、加拿大同埋阿爾及利亞展出，班獅子今次都係第一次出現喺亞洲。雙年展合共會有50隻各具特色嘅獅子雕塑作展覽，分別由中國同埋法國兩地藝術家設計，但一向都好鍾意藝術嘅何超瓊今次就冇落手設計。
而其中18隻獅子會留喺美高梅展藝空間嘆冷氣，其餘32隻遲啲就會陸陸續續出現喺澳門嘅大街小巷，包括澳門旅遊塔、壹號廣塲同澳門文化中心等地。
