前任特首還沒當上特首，但已知黃袍加身，會搬入禮賓府之前，曾邀約不同的專欄作家到白加道官邸茶敍，預先聯誼一番，左丁山也在受邀之列。記得那一天的下午，天朗氣清，從白加道下望維港，確令人心曠神怡，有志得意滿之感。曾先生問及香港政治前景有甚麼憂慮之處，左丁山不假思索咁話：「基本法有香港民主直選嘅條文，他日落實之時，希望香港唔會分裂為兩派爭論不休。」曾先生不置可否，只講過還有時間去解決。
今天的情況果然如此，香港已分成黃衫軍（類似泰國分類，即否決無限制民主選舉的精英富裕階層）與紅衫軍（極力擁護一人一票的非曼谷泰人），以黃衫、紅衫比喻，未必完全精準，但也差不多了，譬如反對新界東北發展的人士就幾似泰國東北人民。
數十年前，金庸在明報社論寫過，香港搞選舉，共產黨左派必勝，因為香港（當年）沒有可抗衡共產黨組織市民的力量。快速推前至21世紀，共產黨已收回香港，在香港能動員的能量，更是大到無倫，但卻沒有在普選必勝的把握，唔係好令人意外咩？既無把握，就要諸多限制，怕好似泰國黃衫軍咁，逢選必輸吖嘛。
為咗證明自己有力動員群眾，香港黃衫軍已在周圍搜集簽名，希望人數唔好輸俾與6.22公投嘅七十幾萬名市民；但睇起嚟似乎起動得幾辛苦喎，唔見得好多人自動自願簽名，要分頭搵人交數。退休校長L就打電話嚟講：「哎吔，校長K嚟電郵，請我簽名支持反佔中，點好？」左丁山唔敢畀意見，以免傷害他人感情，校長L與校長K都係中大校友，校長L從來只講教書教育及社會服務，不講政治，校長K則間中與中聯辦活動有關係，平時大家都係老友，現在點好呢？頗有台灣家庭分藍綠，泰國同學分紅黃咁嘅味道！香港建制派本來要錢有錢（民建聯晚會拍賣籌款已騷盡quali），要人有人（蛇齋餅糭威力無窮），但做起文宣上嚟，就好似儍仔咁，幾令人意想不到。最近左丁山收到一篇李嘉誠文章，頗覺驚奇，問清楚，原來係冒名假貨，跟住見到李純恩否認網上署名文章，上星期六又收到中文大學澄清，一篇署名沈祖堯之文章純屬虛構。啲「冒牌寫手」認真無聊，令建制派蒙羞。睇真啲，冒名文章寫得幾暢順，何不大大方方咁用正真名，公開發佈呢？