今屆世界盃，一眾女士為求出位揚名，有人想盡辦法拋胸引玉、有人做採訪都不忘露Bra騷身材，佢哋無非博上鏡；但有位17歲比利時女學生艾絲（Axelle Despiegelaere）就乜都唔使做，青春逼人嘅佢，憑長長嘅金髮、天生嘅純情樣配埋甜美笑容，唔使露肉，一件比利時背心、一頂牛角帽，就為佢帶嚟一紙模特兒合同，係咪羡慕死人呢？
FB狂吸20萬粉絲
艾絲喺上月22號同朋友仔一齊去到巴西撐比利時對俄羅斯一仗，佢嘅純情笑面俾攝影記者影低咗後，喺互聯網同報章瘋傳。4日後，艾絲設立自己既Facebook專頁，短短日子已吸引超過20萬粉絲。唔單止咁，連法國著名美容品牌L'Oreal都睇中佢，簽佢做品牌模特兒，真係無心插柳、飛上枝頭呢啲句子都唔足以形容艾絲嘅神奇世盃經歷。睇真啲艾絲個樣，仲有7成似美劇《Glee》（歡樂合唱團）入面個啦啦隊靚女Dianna Agron㖭。
艾絲星期二喺Facebook宣佈同L'Oreal簽約時話：「感覺真係好興奮。」呢頭講完，轉頭就話咁快同品牌拍咗輯洗頭水宣傳片，艾絲仲擺埋上網㖭。雖然比利時已喺8強止步，但艾絲嘅經歷令一眾比利時球迷帶嚟一種世盃延續性，都祝福佢有個美好嘅將來。
國產乳神冇晒下文
其實，曾幾何時，《沙灘拯救隊》嘅女主角之一「拉姑」彭美拉安德遜，89年喺加拿大睇美式足球比賽中，被攝入場內螢幕，當年21歲嘅拉姑之後就俾一間啤酒品牌請佢做廣告模特兒，之後更展開演藝生涯，所以話有啲嘢唔恨得咁多。好似早排國產乳神樊玲喺世盃「胸夾手電」，被人傳完一輪後就不了了之囉。
【依波Live】即睇直播：
http://worldcup2014.appledaily.com/match/live
http://bit.ly/EballLive