上個月20號因高息效應，重慶機電（2722）股價一個下跌裂口之後，呢期蠢蠢欲動又想撲上高位。集團家陣得5倍幾PE，業務又瓣瓣掂，再加上呢期國企改革開始密集，遲早到重機，可以揸實。
重機主打各瓣環保電力設備、通用機械同汽車零部件。上年集團風電葉片銷售額達10億元人仔，佔咗總收入嘅10%，唔係細數。啱啱4月報載，集團估計今年呢瓣定單會大升。而專業預測全球風電市場規模，六年後達1,160億元人仔，係2008年時嘅5倍！重機嘅長、中、短線，通殺！
又中汽協啱啱公佈，上半年祖國汽車銷量增加咗8%達1,168萬輛。重機之前對呢瓣業務比較審慎，但數據出嚟，相當靚仔，相信重機都估唔到，汽車零部件有驚喜。
阿媽講明隨時注資
重機家陣得6倍幾PE，非常保守，估計集團今、明年度純利，只keep住增長15%，預測PE得5.9倍同5.1倍。重機現價（1.17元）貼近三年底，PB得0.65倍，兼有高達6厘利息。同重機有合作關係嘅外國企業日本EXEDY，今年預測PE近12倍，1倍PB，美國康明斯17倍PE、3.8倍PB。一比落去，重機吸引到流晒口水。
呢期儀征化纖（1033）、洛陽玻璃（1108）同大唐發電（991）重組，重機亦講明，阿媽重慶機電控股不日注入優質資產。後邊重機控股，營收過460億元人仔，純利17億元，透過注資，對重機未來增長，亦如虎添翼。而重機市值得43億銀，比起阿媽過300億銀資產規模，簡直小巫見大巫。揸重機，上到2.36元計，預測PE得12倍，啱啱先追到上邊EXEDY。到時重機市值，先得86億元，講注資，都係奀咗啲啲。
錢雋
細價股專家
本欄逢周二、三、五刊出