立法會下周休會後，唔少議員外遊放暑假，經常要去立法會受靶嘅官員，都係時候可以放假唞一唞。但由於今年嘅暑假因為政改問題熱上加熱，尤其8月底人大常委會發還嘅政改決定，係佔中會否出現嘅關鍵，八方聽聞，特區政府都明示暗示，官員若然要放暑假，最好放到8月中就好歸位喇，咪到8月底發生大鑊嘢時，唔見晒啲人，輸人都要唔輸陣！
八方私下打探過，專責政改諮詢政務司司長林鄭月娥，暫時冇計劃放長假，可能攞幾日假仔休養生息；佢嘅政改三人組隊友之一、律政司司長袁國強亦一樣，大戰當前冇乜放大假大計，有可能放幾日充吓電。政制及內地事務局局長譚志源雖然月尾放假，但8月中之前就會返工咯，唔驚林鄭扭耳仔咩！據聞鬍鬚曾亦會放假relax吓，同樣8月中會返工。