和黃（013）噚日公佈資深賓架顧浩格有意退出活躍商業活動，決定辭去集團獨董職務，睇番資料，顧浩格做和黃獨董都有成10年，今年71歲嘅佢想退下來都好正常。和黃同時宣佈由鄭大班接替顧浩格嘅職務，此鄭大班非名嘴鄭大班，而係滙豐百幾年來首位華人大班鄭海泉。
鄭海泉78年加入滙豐，05年升任滙豐主席，之後更做埋滙控（005）執董，堪稱前無古人、後無來者，絕對係資深賓架。
滙豐同和黃極有淵源，當年若果冇滙豐支持，李嘉誠難以成功入主黃和，李嘉誠仲一度係滙豐副主席，佢私底下同鄭海泉亦十分老友，2011年鄭海泉退休酒會，佢都有親自到場。
鄭海泉退休後生活簡單，主要弄孫為樂，最近出席中大畢業禮時相當精神，和黃能夠請得鄭海泉做獨董，相信靠嘅係一張人情牌，而唔係12萬嘅董事袍金。